2Cor 5 | KMG | STEP | Nâŋe šiŋuc manaŋgopeneŋ: Mâreŋte ficboze-nâŋec raruŋkeme Anutuzi sambâŋko ficsanaŋ moc bâfua-nâreocmu, fic i mezi mi bakicne, mâc qiŋ sanaŋ qaŋqaŋ qakicne.

2 Corinthians 5

Boze wamba-nâŋec raruŋkeme Wofuŋzi ficsanaŋ bâfua-nâreocmu

1 Nâŋe šiŋuc manaŋgopeneŋ: Mâreŋte ficboze-nâŋec raruŋkeme Anutuzi sambâŋko ficsanaŋ moc bâfua-nâreocmu, fic i mezi mi bakicne, mâc qiŋ sanaŋ qaŋqaŋ qakicne. 2 Eme nâŋe irec hâcne sambâŋkonec fic i henâreme huocte aŋac-nâpome harac huacbuc ehuc jueŋgopeneŋ. 3 Maŋ qâqâtâc-nâŋeczi biuctac ezacte i hâcne rojupene sâckeocmu. 4 Sahac boze-nâŋecko junaŋmu sâc ŋeŋe rârâqâc enâreme hujâi ehuc jueŋgopeneŋ. Nâŋe ŋaqi-nâŋec raŋɋane hetaranaŋte mi enâreekac, i fohame fainao ɋâricne henareme huocte enâreekac. Ehuc hâmocte biŋe ekicne i jujuzi ɋâckeocte mueŋgopeneŋ. 5 Wiac biaŋ i fua-nâreocte bâmoc-nâpowec i Anutu eki hâcne, ehuc irec kifac Mâro hâcne râe-nârewec.

Ʒira mâreŋ jabao jueŋgopeneŋ

6 Nâŋe irec hâcne mana afeckehuc jueŋgopeneŋ. Ehuc šiŋuc manaeŋgopeneŋ: Mâreŋ sahaczi haefuŋ-nâŋec eha jueŋgopeneŋ,i Wofuŋ basahuc mâreŋ jabao jueŋgopeneŋ. 7 Dameŋ šiŋuczia maŋzi wiac manasiŋkehuc jujune sawa fokac, fârine hohone aricne. 8 Erâ sifu mana afeckeeŋgopeneŋ. Ehuc sahachec mâreŋ jabao juju i beherâ mame sâko hae-nâŋecko Wofuŋhec juju irec aŋac-nâpoekac. 9 Eme juju i mame sâko haeo me mâreŋ jabao junaŋmu ine kecšiŋuc muhuc ropaŋ eeŋgopeneŋ: Aimuŋ jupene Wofuŋzi honec-nâpome sâckezejec. 10 Ʒiŋuc hâcne manaŋgopeneŋ: Juku šeŋgoma Kristore dâŋ mumutara ŋeŋe fuŋnao fua tâcnepene, sahachec juhuc wiac hurekicne, biaŋne me sâqocne, irec tofa ru sâc bazu-nâreocmu.

Paulore fuŋne i Anutu â ŋic mâmâc manambiŋ

11 Wofuŋ araŋ bacnehuc junaŋte mukicne i manahuc ŋic mu hemiriŋ ejareeŋgopeneŋ. Iŋuc ehapene Anutuzi maŋnâŋec honeekac, â ŋoŋe iŋuc jaha maŋŋeŋiczi fuŋne-nâŋec ŋazame manaeŋgopieŋ. 12 Nâŋe iŋuc mupene manapie nâŋe harierâ bâbâmiriŋ dâŋ muŋgopeneŋ mi ezejec. Nâŋe mâc ŋaza qâmoc eŋgopeneŋ, eme ŋoŋe ŋic gâcne, maŋtac juhuc sahackopec wiacte sawa penaroŋ eeŋgopieŋ, jaŋe dâŋ i jazahuc bâsâoc-nâponšepieŋ. 13 Nâŋe maŋnâŋec ŋeŋgoroŋkeekacko ine Anutu gie-ticnere erâ ŋeŋgoroŋkeekac, me maŋnâŋec fâretiŋ foekacko ine ŋoŋe mitihec eniŋte iŋuc foekac.

Anutuzi ââgo šâšâfic dâŋ âkendâŋnewec domakac

14 Kristore maŋjauŋzi maŋnâŋec fenšoŋkehame juhuc šiŋuc mana sanaŋkeeŋgopeneŋ: Mocjahazi okac-nâŋec hâmowecte mâmâc sâko hâmombeŋ ekac. 15 Mâmâc sâko okac-nâŋec hâmowec ine kecšiŋucte: Juju i nâŋâc nâŋâcnere mâcne, okac-nâŋec hâmorâ faharewec ere erâ junšepeneŋ. 16 Irec ši miti dameŋko sahac hawari sawa hohonec erâ šâšâŋitac i sâcne mi enaŋmu. Erâ wâc Kristo iŋuc jaha mârâc sahac hawarine honehuc šâŋitambeŋ, irec sâc šiŋuczia mocwâc mi enaŋmu. 17 Irec ŋic moc Kristorao šuhuckeekac e fuŋmoc eekac. Ine wiac raŋɋane omaewec, ŋicbureŋ, wiac ɋâricne fuawec. 18 Wiac i Anuture mâsi sasawa. Eki hâcne Kristozi jahacnehec miriŋ bacnâpowec. Erâ nâŋâc miriŋ babac biŋedâŋ mupene haŋ baocte irec gie munârewec. 19 Ine hâcne Anutu e Kristoo juhuc mâreŋŋic jahacnehec miriŋ bacnâpowec, ehuc kiŋnâŋec behewec. Erâ miriŋ babac dâŋ ŋondeŋ-nâŋecko âkendâŋnewec domakac. 20 Irec nâŋe Kristore biŋe mumuzi Anuture mu baafec dâŋ ŋazaeŋgopeneŋ. Nâŋe Kristo âkehockehuc numu-ŋareeŋgopeneŋ: Anutuhec miriŋ babac enšepieŋ. 21 Sâqocnere kâuc bawec e Anutuzi nâŋâcnere erâ sâqocne bapa mucnewec, i nâŋâc Jesuhec qâfâsâehuc Anuture tiŋne jujufâc enaŋte iŋuc hâcne ewec.